ဘဝရဲ့ တဆစ်ချိုးလို့ ခေါ်ဆိုင်နို်င်တဲ့ ကျောင်းသူကျောင်းသားတိုင်းအတွက် အရေးအကြီးဆုံးသော တက္ကသိုလ်ဝင်တန်းစာမေးပွဲကြီး နီးကပ်လို့လာပါပြီ။
တက္ကသိုလ်ဝင်တန်းစာမေးပွဲဆိုတာ တစ်နည်းပြောရရင် ကျောင်းသူကျောင်းသားတွေ ရှေ့ဆက်လျှောက်လှမ်းရမယ့် အနာဂတ်ကို အတိုင်းအတာတစ်ခုအထိ အဆုံးအဖြတ် ပေးနိုင်မယ့် စာမေးပွဲလို့လည်း ဆိုနိုင်ပါတယ်။ ကိုယ်ကြိုးစားရင် ကြိုးစားသလောက် အောင်မြင်မှုကို ပိုင်ဆိုင်နိုင်မှာပါ။
ဆိုတော့ အခုလို စာမေးပွဲနီးကပ်လာပြီဆို တစ်နှစ်ပတ်လုံး ကျက်ထားတာတွေ မေ့သွားတာမျိုး၊ ဘယ်စာကို ဘယ်လို Revision ပြန်ရမလဲ မသိတော့တာမျိုးတွေ ဖြစ်ကုန်ကြတာ သဘာဝပါ။
ဒါကြောင့် ဒီနေ့မှာတော့ MMC က မကြာမီမှာ တက္ကသိုလ်ဝင်တန်း ဖြေဆိုတော့မယ့် ကျောင်းသူကျောင်းသားလေးတွေ တက္ကသိုလ်ဝင်တန်းစာမေးပွဲအတွက် အကောင်းဆုံး ပြင်ဆင်ထားနိုင်ဖို့ ဘယ်လို Tips လေးတွေသုံးပြီး လေ့လာကျက်မှတ် ပြင်ဆင်ကြရမလဲဆိုတော ပြောပြပေးလိုက်ပါတယ်။
အချိန်ဇယားဆွဲပါ။
ပထမဆုံး လုပ်သင့်တာက ကိုယ့်ရဲ့ စာကျက်အချိန်ဇယားဖြစ်ပါတယ်။ စာမေးပွဲဖြေဆိုရဖို့ ရက်ပေါင်း ဘယ်လောက် ကျန်သေးလဲဆိုတာပေါ် မူတည်ပြီး အချိန်ဇယားဆွဲထားပါ။ တစ်ရက်ကို ဘယ်နှနာရီ စာလုပ်မယ်၊ ဘယ်ဘာသာကို အရင်ဆုံး စကိုင်မယ်၊ ဘယ်ဘာသာပြီးရင် ဘယ်ဘာသာကို ဆက်လုပ်မယ်၊ ဘယ်နေ့မှာတော့ ၆ ဘာသာလုံးပြီးနေရမယ်၊ ဘယ်နေ့ရောက်ရင် စာပြန်နွှေးမယ် စသည်ဖြင့် Timeline သတ်သတ်မှတ်မှတ်လုပ်ပြီး ပြင်ဆင်မယ်ဆိုရင် စာမေးပွဲကိုရင်ဆိုင်ဖို့ အဆင်သင့်ဖြစ်နေပါလိမ့်မယ်။
အာရုံစိုက်ပါ။
စာလုပ်ပြီဟေ့ဆိုရင် စာကိုပဲ အာရုံစိုက်ပြီး သေချာကျက်မှတ် လေ့လာပါ။ ဥပမာ ကိုယ့်ရဲ့ အခန်းထဲမှာဖြစ်ဖြစ် တိတ်ဆိတ်ငြိမ်သက်တဲ့ နေရာတစ်ခုခုမှာ ဖြစ်ဖြစ် ကိုယ့်ကို အာရုံမထွေပြားစေပဲ အနှောင်အယှက် ကင်းကင်းနဲ့ စာလုပ်လို့ရမယ့် နေရာကိုရှာပါ။ ပြီးရင် အခုလိုအချိန်မှာ တီဗီကြည့်တာ၊ ရုပ်ရှင်ကြည့်တာ၊ ဖုန်းသုံးတာတွေကို တတ်နိုင်သမျှ လျှော့ချဖို့လိုပါတယ်။ စာကိုပဲ အချိန်ပြည့် အာရုံစိုက်နိုင်ရင်တော့ အကောင်းဆုံးပါပဲ။ ဒါပေမယ့် ခဏတာ အနားယူချိန်မှာ ဖုန်းသုံးမယ်ဆိုရင်လည်း ကိုယ့်ကိုယ်ကို စည်းကမ်းသတ်မှတ်ပြီး သုံးသင့်ပါတယ်။
Notes ထုတ်ပါ။
စာတွေတော့ ကျက်နေတာပဲ၊ မှတ်နေတာပဲ၊ ဒါပေမယ့် ဘာမှလည်း ခေါင်းထဲမဝင်ဘူးဆိုတာမျိုး ကျောင်းသူကျောင်းသားတွေမှာ ဖြစ်နေကြပါ။ အထူးသဖြင့် စာမေးပွဲရက်ကပ်လာလို့ စိတ်ပူပင်လာပြီဆို ပိုတောင်ဖြစ်တတ်ပါတယ်။ လုပ်သင့်တာက ကိုယ်လက်ရှိ ကျက်မှတ်နေတဲ့ ဘာသာရပ်အလိုက် Notes လေးတွေထုတ်ထားပါ။ ကိုယ်မကြာခဏ မေ့တတ်တဲ့ Definition မျိုးတွေ၊ မှားတတ်တဲ့ Equation မျိုးတွေကို ချရေးပြီး Notes ထုတ်၊ Highlight လုပ်ရမယ့် အရေးကြီးတဲ့အပိုင်းတွေကို လုပ်၊ ဒါဆိုရင် စာလုပ်ရတာ လွယ်ကူနိုင်ပါတယ်။
မပိုင်သေးတာတွေကို ဦးစားပေးပါ။
ကိုယ်က Physics ကျက်ရတာတွက်ရတာ ကြိုက်တယ်၊ ဒါပေမယ့် Chemistry ကြီးကိုတော့ သိပ်လည်း မကိုင်ချင်ဘူး၊ ရသလိုလို မရသလိုလို ဖြစ်နေတယ်လို့ စိတ်ထင်နေတယ်ဆို Chemistry ကိုသာ အရင်ဆုံး အစောဆုံး ဦးစားပေးလုပ်ဖို့ အကြံပေးလိုက်ပါရစေ။ ကိုယ့်အတွက် ခက်ခဲတဲ့ ဘာသာရပ်မျိုးကို စိတ်ကြည်လင်နေတုန်းမှာ အားအင်အပြည့် အာရုံစူးစိုက်မှု အပြည့်နဲ့ ဦးစားပေးလုပ်သင့်ပါတယ်။
မေးခွန်းဟောင်းတွေ လေ့ကျင့်ပါ။
ပွဲမဝင်ခင် အပြင်က ကျင်းပဆိုသလိုပေါ့၊ မေးခွန်းဟောင်းတွေကို ဖြေဆိုကြည့်ခြင်းဖြင့် ဘယ်ဘာသာရပ်တွေမှာ အချိန်ဘယ်လောက်ကုန်တယ်၊ သတ်မှတ်ချိန် ၃ နာရီအတွင်း အံဝင်ခွင်ကျဖြစ်ဖို့ဆို ဘာတွေလုပ်ဖို့ လိုတယ်၊ စတာတွေကို သိလာပါလိမ့်မယ်။ များများလေ့ကျင့်ပါ၊ များများဖြေဆိုကြည့်ပါ။ ဒီနည်အားဖြင့် ဘာသာရပ်တွေကို ကျွမ်းကျင်လာမယ့် အပြင် ကိုယ်ရဲ့ဖြေဆိုရေးသားနှုန်းနဲ့ ဘာသာရပ်အပေါ် ကျွမ်းကျင်ပိုင်နိုင်မှု အရည်အသွေးတွေကိုပါ တိုးတက်လာစေနိုင်ပါတယ်။
ကျန်းမာရေး ဂရုစိုက်ပါ။
တစ်ညလုံး မအိပ်ဘဲ စာကျက်တာမျိုး၊ မအိပ်ဘဲ နေနိုင်အောင် ကျန်းမာရေးအတွက် မသင့်တော်တဲ့ အစားအသောက်တွေ စားသုံးတာမျိုးတွေ ရှောင်ကျဉ်ပါ။ အိပ်ရေး၀၀ အိပ်ပါ။ အာဟာရ ပြည့်အောင် စားသုံးပါ။ ကိုယ်လက် လှုပ်ရှားမှု လုပ်ပေးပါ။ စာတွေအကုန် ပိုင်နိုင်နေပါလျက်နဲ့ ကျန်းမာရေး ပြဿနာကြောင့် တစ်နှစ်ပတ်လုံး ကိုယ်ကြိုးစားထားခဲ့ရသမျှတွေ သဲထဲ ရေသွန်ဖြစ်သွားတာမျိုးတွေ ရှိတတ်တာကြောင့် ကျန်းမာရေးကို သေချာဂရုစိုက်သင့်ပါတယ်။
Cramming လုပ်တာမျိုး ရှောင်ပါ။
လူတစ်ယောက်နဲ့ တစ်ယောက် မှတ်ဉာဏ်စွမ်းရည် မတူပါဘူး။ တချို့က အချိန်တိုအတွင်း မှတ်သားနိုင်စွမ်း အားကောင်းပေမယ့် ရေရှည်မမှတ်သားထားနိုင်ဘူး၊ တချို့ကကြ ဖြေးဖြေးမှန်မှန်နဲ့ ကြာရှည် မှတ်သားနိုင်စွမ်းရှိတယ်။ ကိုယ်က ဘယ်အထဲမှာပါလဲ သိထားဖို့ လိုပါတယ်။ ယေဘုယျအားဖြင့် ပြောရမယ်ဆိုရင်တော့ Cramming လုပ်တာကို အားမပေးချင်ပါဘူး။ အနားနီးမှ စုပြုံကျက်တာမျိုးက အမှားအယွင်းများနိုင်တာကြောင့် ဖြစ်ပါတယ်။ ဒါကြောင့် ကျက်သင့်တာမှတ်သင့်တာတွေကို ကျက်သင့်မှတ်သင့်တဲ့အချိန်မှာ ကျက်မှတ်လေ့လာပြီး စာမေးပွဲနီးတဲ့အခါ စာပြန်နွှေးတာက အကောင်းဆုံးပါပဲ။
မိမိကိုယ်ကို ယုံကြည်မှုရှိပါ။
ငါလုပ်နိုင်တယ်ဆိုတဲ့ စိတ်မွေးပါ။ မိမိကိုယ်ကို ယုံကြည်မှုကို လက်တွေ့ကြိုးစားခြင်းဖြင့် တည်ဆောက်ပါ။ ကိုယ်သင်ကြားခဲ့ရတဲ့ အကြောင်းအရာတွေကိုပဲ ဖြေဆိုရမှာ ဖြစ်တဲ့အတွက် ငါဖြေနိုင်ပါ့မလားဆိုတဲ့အတွေးကို လုံးဝမတွေးပါနဲ့။ ကိုယ့်ဘက်က အကောင်းဆုံး ကြိုးစားဖို့သာ လိုပါတယ်။ ကြိုးစားမှုတိုင်းအတွက် ထိုက်တန်တဲ့ ရလဒ်ဆိုတာ ရှိစမြဲပါ။
ကဲ … ဒီလောက်ဆိုရင်တော့ တက္ကသိုလ်ဝင်တန်းစာမေးပွဲကြီး ဖြေဆိုမယ့် ကျောင်းသူကျောင်းသားတွေအတွက် အထောက်အကူဖြစ်မယ်လို့ မျှော်လင့်ပါတယ်နော်။
သင့်အနာဂတ်က သင်ကိုယ်တိုင်ရဲ့ လက်ထဲမှာပါ။
ကြိုးစားခြင်းကို သင်ပိုင်ပါတယ်။ ကြိုးစားပြလိုက်စမ်းပါ။
အကောင်းဆုံးသော ရလဒ်တွေ ရယူပိုင်ဆိုင်နိုင်ကြပါစေလို့ MMC မှဆုမွန်ကောင်း တောင်းပေးလိုက်ပါတယ်။