“ Brain power improves by brain use, just as our bodily strength grows with exercise” ဆိုတဲ့ စကားလိုပါပဲ။

ကျွန်တော်တို့ရဲ့ ဦးနှောက်စွမ်းရည်ဆိုတာမျိုးက ထက်လာအောင်အမြဲ သွေးပေးနေသင့်တဲ့ ဓားတလက်လိုပါပဲ။
ကိုယ်တိုင် နည်းမှန်လမ်းမှန်နဲ့ အမြဲ အသုံးပြုနိုင်မှ တိုးတက်လာတာမျိုးပါ။

ကျွန်တော်တို့ စတင်မွေးဖွားလာထဲက ၂၄ နာရီ လုံးလုံး အလုပ်လုပ်နေတဲ့ ဦးနှောက်က တခါတလေ ကျွန်တော်တို့ မှတ်လို သမျှကို မမှတ်ထားနိုင်တာမျိုး၊ မှတ်ထားပြီးသမျှကို မေ့ပစ်လိုက်တာမျိုး စတဲ့ အခြေအနေတွေကိုလည်း ကြုံရမှာပါ။

အထူးသဖြင့် ကျွန်တော်တို့ ကျောင်းသားတွေ စာလေ့လာကျက်မှတ်တဲ့ အခြေအနေမျိုးမှာပေါ့။
ကျွန်တော်တို့ ကျောင်းသားအများအစု ကြုံတွေ့ရလေ့ရှိတာက တခါတလေမှာ ဘယ်လောက် အာရုံစိုက်ပြီး ကြိုးစားမှတ်နေနေ ဦးနှောက်က ဘာမှ မမှတ်မိနိုင်တဲ့ အခြေအနေမျိုးနဲ့ အားလုံးလိုလို ကြုံဖူးကြမှာပါ။

ဒီလို ဘာကြောင့် ဖြစ်ရတာလဲ ဆိုရင် စာကျက်မှတ်လေ့လာရမှာ အဓိက အရေးကြီးဆုံး အရာ ဖြစ်တဲ့ ဦးနှောက်ရဲ့ စွမ်းဆောင်ရည်ကို ကျွန်တော်တို့ရဲ့ လွဲမှားနေတဲ့ အကျင့်တွေက နှောက်ယှက်ဖျက်ဆီးနေလို့ပါပဲ။
(ဥပမာ ဦးနှောက်စွမ်းရည်ကို ကျဆင်းစေနိုင်တဲ့ အချိန်မျိုးုဖြစ်တဲ့ အိပ်ရေး မဝမလင်ဖြစ်နေချိန်တွေမှာ ဘယ်လောက် အာရုံစိုက်ကြိုးစားလေ့လာပါစေ ထိထိရောက်ရောက် လေ့လာမှတ်သားလို့ရမှာ မဟုတ်ပါဘူး။)

တနည်းအားဖြင့် ပြောရရင် စာကျက်မှတ်လေ့လာတယ် ဆိုတာကလည်း စာကျက်ချင်တဲ့အချိန် စာကြည့်စားပွဲမှာ ထိုင်ပြီး ကျက်လိုက်တာမျိုးထက် နည်းလမ်းတကျ ကြိုတင်ပြင်ဆင်ပြီး လေ့လာကျက်မှတ်မှသာ "Smart Study" ဖြစ်လာမှာ ဖြစ်လာမှာပါ။

အချိန်တိုအတွင်း Effective နဲ့ Efficient ဖြစ်ဖြစ် လေ့လာမှတ်သားနိုင်ဖို့ဆိုတဲ့နေရာမှာ ကိုယ့် ဦးနှောက်စွမ်းရည်ကို အကောင်းဆုံး အမှန်ကန်ဆုံး ပံ့ပိုးပေးနိုင်တဲ့ နည်းလမ်းတွေနဲ့အတူ ကြိုတင်ပြင်ဆင်ထားသင့်ပါတယ်။

ဆိုတော့ ဘယ်လို နည်းလမ်းတွေ စာကျက်မှတ်လေ့လာရာမှာ ဦးနှောက်စွမ်းရည်ကို ပိုမို အထောက်အကူ ပြုနိုင်လဲဆိုတာ တချက်လောက် လေ့လာကြည့်လိုက်ကြပါဦး။

အချိန်ခွဲပြီး လေ့လာကျက်မှတ်ပါ။

သုတေသီတွေရဲ့ အဆိုအရ "Prolonged Cramming" လုပ်ခြင်းက ဦးနှောက်ရဲ့ စွမ်းဆောင်ရည်ကို ကျဆင်းနိုင်တာမို့ အချိန်အကြာကြီး တထိုင်တည်း စာကျက်တာမျိုးထက် ဦးနှောက် ကို ခေတ္တ အနားပေးပေးပြီး ကျက်တာမျိုးက ပိုမို ထိရောက် မှုရှိတဲ့အတွက် ဦးနှောက် စွမ်းရည်ကို ပိုမိုတိုးတက်စေနိုင်တဲ့ နည်းလမ်းတစ်ခုဖြစ်တဲ့ Study Session အလိုက် ကျက်မှတ်တာမျိုး ပြုလုပ်ပေးပါ။

စာကျက်တဲ့နေရာကို အပြောင်းအလဲ လုပ်ပေးပါ။

ကျွန်တော်တို့ ဦးနှောက်ရဲ့ ထူးခြားချက်တစ်ခုက နေရာအသစ် အပြောင်းအလဲ အသစ်တွေမှာ ဖြစ်ပျက်တတ်တဲ့ အဖြစ်အပျက်တွေ၊ သတင်းအချက်အလက်တွေကို ပုံမှန်ထက် ပိုမို အမှတ်ရ နေတတ်ပါတယ်။ ဒါကြောင့်လဲ စာကျက်မှတ်လေ့လာရာမှာ ပုံမှန်စာကြည့်စားပွဲမှာပဲ ကျက်မှတ်တတ်တဲ့အကျင့်ထက် စာကြည့်တိုက်မှာ သွားရောက်ကျက်မှတ်တာပဲဖြစ်ဖြစ် ကိုယ့်အတွက် စာကျက်လို့ ကောင်းတဲ့ တိတ်ဆိတ်ငြိမ်သက်တဲ့ ပတ်ဝန်းကျင်အပြောင်းအလဲတစ်ခုမှာ လေ့လာကျက်မှတ်ခြင်းက ဦးနှောက်ရဲ့ မှတ်ဉာဏ်စွမ်းရည်ကို ပိုမို ကောင်းမွန်စေပါတယ်။

တရေးတမော အိပ်စက်အနားယူပါ။

ဦးနှောက်စွမ်းရည် မြင့်မားစွာနဲ့ စာလေ့လာကျက်မှတ်ဖို့အတွက် နည်းလမ်းကောင်းတွေထဲမှာ ဒီအချက်ကို ထည့်ထားတာ ရယ်စရာကောင်းနေပေမယ့် အမှန်တကယ် ထိရောက်တဲ့ နည်းလမ်းပါ။
တရေးတမောအိပ်စက်အနားယူခြင်းက ဦးနှောက်စွမ်းရည်ကို ပိုမိုမြင့်မားလာအောင် စွမ်းဆောင်ပေးနိုင်တဲ့အတွက် သင့်စာကျက်ချိန် Timetable ထဲမှာ Napping Time ကို မဖြစ်မနေ ထည့်ပါ။

မကျက်ပါနဲ့။ မှတ်ပါ။

စာကျက်မှတ်တဲ့နေရာမှာ မျက်လုံးကဖတ်ပြီး ပါးစပ်က ကြက်တူရွေး နှုတ်တိုက်အော် သလို အော်ကျက်နေတာမျိုးထက် အဓိပ္ပာယ်ကို သေချာ နားလည်အောင် မှတ်တာမျိုးကသာ ဦးနှောက်ရဲ့ မှတ်နိုင်စွမ်းရည်အတွက် အသုံးဝင်တာပါ။

ကိုယ်တိုင် မှတ်ဉာဏ်စွမ်းရည် အကြောင်း လေ့လာပါ။

လူတစ်ဦးနဲ့ တစ်ဦး ဦးနှောက် ဉာဏ်ရည်ချင်း မတူညီကြသလို မှတ်ဉာဏ် စွမ်းရည်ရဲ့ အလုပ်လုပ်ပုံခြင်းလည်း မတူညီကြပါဘူး။ ဥပမာ - အချို့ကတော့ ညနက်ထိ စာလုပ်တာက ပိုထိရောက်မှုရှိတယ်လို့ဆိုကြပေမယ့် အချို့ကတော့ တစ်ညလုံးကျက်မှတ်လိုက်ပေမယ့် မနက်မိုးလင်းတဲ့အခါ ဘာမှ မမှတ်မိတော့သလိုဖြစ်သွားတာမျိုးတွေလဲ ရှိပါတယ်။
ဒါကလည်း အပေါ်မှာ ပြောခဲ့သလိုပဲ ။
ဒါကြောင့် ကိုယ့်ရဲ့ ဦးနှောက်က၂၄ နာရီအတွင်း ဘယ်လိုအချိန်မှာ Energetic အဖြစ်ဆုံးလဲ၊ ဒီလိုအချိန်မှာ ကိုယ်က ဘယ်လိုနည်းတွေနဲ့ Support လုပ်ပြီး Smart Study ဖြစ်အောင် ကြိုးစားမလဲ ကိုယ်တိုင် သိအောင်လုပ်ဖို့ အရေးကြီးပါတယ်။

အခြားတယောက်ကို စာသင်ပေးနေသလို ကျက်မှတ်ကြည့်ပါ။

အများအားဖြင့် သီအိုရီတွေ သင်္ချာတွက်နည်းတွေ ကို အခြားတစ်ယောက်ကို သင်ပြပေးတဲ့အခါ ကိုယ်တိုင်လည်း ထပ်ခါထပ်ခါ ပိုမို နားလည်သဘောပေါက်လာပြီး မှတ်ရ ပိုလွယ်လာတယ်လို့ ဆိုကြပါတယ်။ ဒါက ဘာကြောင့်လဲဆိုရင် အမှန်တကယ် ကိုယ်တိုင် နားလည်ထားတဲ့ သီအိုရီ သဘောတရားတွေက ကိုယ်ပိုင် စကားလုံး၊ ကိုယ်ပိုင် မှတ်ဉာဏ်စွမ်းရည်နဲ့ ရှင်းလင်းသင်ပြလိုက်တာဖြစ်လို့ပါ။ ကိုယ်တိုင်က ရှင်းရှင်းလင်းလင်း နားလည်သဘောပေါက်မှသာ အခြားသူကိုလည်း အသေးစိတ် ရှင်းလင်းစွာ သင်ကြားပြသပေးနိုင်တာမို့ ဒီလို စာကျက်မှတ်
လေ့လာတဲ့နေရာမှာလည်း ကိုယ်က ပိုင်နိုင်သွားပြီလို့ ထင်ရင် အခြားတယောက်ကို ရှင်းပြပြီး ကိုယ့်ရဲ့ နားလည်သဘောပေါက်မှု စွမ်းရည်ကို စစ်ဆေးကြည့်ပါ။ ဒါမှ မဟုတ် ကိုယ်တိုင်ပဲ အခြားတယောက်ကို စာသင်ပြပေးနေသလို ပုံစံနဲ့ ကျက်မှတ်ကြည့်ပါ။ ဒီလို နည်းလမ်းက အကောင်းဆုံး Smart Study တွေထဲက တစ်ခုပါပဲ။

ကျက်မှတ်လေ့လာတတ်ပါစေ။

Student Lifetime မှာမှ မဟုတ်ပါဘူး။ လူတိုင်းက ဘဝမှာ အသစ်အသစ်တွေကို အမြဲ ထိတွေ့ လေ့လာနေရတာပါ။ ဒီလိုလေ့လာတဲ့နေရာမှာ ကျွန်တော်တို့အနေနဲ့ ကိုယ်တိုင် ဦးနှောက်စွမ်းရည်ကို အသုံးချပြီး ကျက်မှတ်လေ့လာတာမျိုးဖြစ်ဖို့ အရေးကြီးပါတယ်။ ဆိုလိုချင်တာက ကိုယ်ရဲ့ "Learning Process" ထက် "Learning Progress" ကို တစတစ တိုးတက်မြင့်မားလာအောင် ကြံဆနိုင်ဖို့ပါ။ ဒါမှသာ ဉာဏ်ရည်ဉာဏ်သွေးကလည်း အမြဲ တိုးတက်လာမှာဖြစ်ပြီး ဦးနှောက်ရဲ့ မှတ်ဉာဏ်စွမ်းအားကို အထောက်အပံ့ ဖြစ်စေနိုင်တဲ့ Smart Study မျိုးဖြစ်လာမှာပါ။

ဆိုတော့ ဒီလို Study Tactics တွေကို လိုက်နာပြီး ကိုယ်တိုင် ဦးနှောက်စွမ်းရည် ကို Support လုပ်ပါ။
Train လုပ်ပြီး Smart Study ဖြစ်အောင် ကျင့်ယူပါ။

ကောင်းမွန်ထိရောက်တဲ့ ကျက်မှတ်လေ့လာခြင်းတွေက တဆင့် မိမိတို့ရဲ့ Educational Pathway မှသည် Career Pathway ထိတိုင်အောင် အောင်မြင်မှု ပေါင်းများစွာ ဆွတ်ခူးနိုင်ကြပါစေ။