🔹ကျွန်တော်အားလုံးလိုလို ငယ်စဉ်က ကျောင်းမှာ သင်ယူလေ့လာခဲ့ရသမျှ စာတွေ့တိုင်းဟာ တကယ်တမ်း ပြင်ပ လက်တွေ့ ဘဝကို ဝင်ရောက်လိုက်ကြရတဲ့အခါ အသုံးဝင်ခဲ့သလောက် လက်တွေ့ဘဝမှာမှ သိခဲ့သင်ခဲ့ရတဲ့ အချို့သော အကြောင်းအရာသင်ခန်းစာတွေက ကတော့ ငယ်စဉ်က စာအုပ်တွေထဲ သင်ယူခဲ့ရတာတွေထဲ ပါမလာခဲ့ပါဘူး။

🔹အသက်အရွယ် ကြီးရင့်ပြီး ရင့်ကျက်လာတဲ့အမျှ အတွေ့အကြုံတွေက တဆင့်၊ အမှားတွေက တဆင့် မသိလိုက်ဘာသာဖြစ်ဖြစ် သိသိသာသာဖြစ်ဖြစ် လေ့လာသင်ယူ ကြုံတွေ့ပြီး မှတ်သားယူလိုက်ရတာမျိုးတွေပေါ့။
ဆိုတော့ အများစု သင်ယူလိုက်ရတဲ့ သင်ခန်းစာမျိုးတွေများလဲ ကြည့်လိုက်ကြရအောင်။

🔹 ပြဿနာတိုင်းက စိတ်ညစ်စရာ မဟုတ်ပါဘူး။
ငယ်ငယ်က စားလက်စ မုန့်ပြုတ်ကျခဲ့တာကို ဝမ်းနည်းစရာလို့ ထင်ကောင်းထင်ခဲ့ပေမယ့် အခု အသက်အရွယ်မှာ ဒါက ရယ်စရာ အမှတ်တရဖြစ်လို့သွားပါပြီ။ ဒီလိုပါပဲ။ အခုလက်ရှိ ကြုံနေရတဲ့ ပြဿနာကရော နောက်တစ်လ နောက်တစ်နှစ်မှာ ကိုယ့်အတွက် စိတ်ညစ်စရာပဲ ဖြစ်နေဦးမှာလား ဒါမှမဟုတ် မသိလိုက်ဘာသာ ပြီးသွားမှာလား ရယ်မောစရာပဲဖြစ်သွားမှာလား စသည်ဖြင့် စဉ်းစား သင်ယူတတ်ဖို့ပါ။

🔹 အစီအစဉ်တကျ ဖြစ်မလာတတ်ပါဘူး။
ဒီ ဘာသာ ကျက်ပြီး သင်္ချာတွက်မယ် ဆိုတဲ့ Timetable နဲ့ ကျောင်းသားဘဝမျိုး ပြီးဆုံးသွားတဲ့အခါ လက်တွေ့ ဘဝက ဘယ်လောက် စနစ်တကျ အစီအစဉ် နဲ့ ကြိုးစားထားပေမယ့် တခါတရံ ထင်မထားတဲ့ အခက်အခဲ ပြဿနာ အကောင်းအဆိုးး မှန်သမျှ ဖြစ်လာနိုင်ပါတယ်။ ဒါကိုက ဘဝရဲ့ လက်တွေ့ သင်ခန်းစာ ပါပဲ။ ဒါကြောင့် ကိုယ့်မှာ ဘယ်လို အခက်အခဲမျိုးမဆို ကြံ့ကြံ့ခိုင် ရင်ဆိုင်သွားနိုင်မယ့် Positive Mindset နဲ့ အတူ Open Minded ဖြစ်နေဖို့ လိုအပ်ပါတယ်။

🔹 လူ့ဆက်ဆံပေါင်းသင်းရေးတွေက အရာဝတ္ထုတွေထက် အဖိုးတန်ပါတယ်။
ငယ်စဉ်က တန်ဖိုးမထားတတ်ခဲ့သည့်တိုင်အောင် အသက်အရွယ်ကြီးလာတာနဲ့အမျှ ဘဝက ပေးသိလာတဲ့ အသိ တစ်ခုထဲမှာ မိသားစု၊သူငယ်ချင်းအပေါင်းအသင်းနဲ့ ကောင်းမွန်တဲ့ ဆက်ဆံရေးတွေဆိုတာက လူတစ်ယောက်အတွက် ဘယ်လောက် တန်ဖိုးရှိလဲ ဆိုတာပါပဲ။ ဒါကြောင့် လုပ်ငန်းခွင်ကစလို့ ပတ်ဝန်းကျင်အဖွဲ့အစည်းတိုင်းမှာ အကောင်းဆုံးသော ဆက်ဆံရေးတစ်ခုကို လူတိုင်းနဲ့ တတ်နိုင်သလောက် တည်ဆောက်ကြည့်တာက သင့်အတွက် အကျိုးမယုတ်စေတဲ့အလေ့အကျင့်ကောင်းတစ်ခုပါ။

🔹 ဘယ်သူကမှ ကိုယ့်ကို ပျော်အောင် မလုပ်ပေးနိုင်ပါဘူး။
ပျော်ရွှင်မှုဆိုတာက ကိုယ့်အတွင်းမှာပဲ ရှိတာပါ။ ကိုယ့်ပျော်ရွှင်နေဖို့ကလည်း ကိုယ့်တာဝန်ပါပဲ။ ဘယ်သူ့ကိုမှ စေခိုင်းတာဝန်ပေးလို့မရပါဘူး။ ဒါကြောင့် အမှန်ကန်ဆုံးနဲ့ အပျော်ရွှင်ဆုံး ဘဝကို ဖြတ်သန်းတတ်ပါစေ။

🔹 ခွင့်လွှတ်တတ်ပါစေ။
အမှားတိုင်းအတွက် ကိုယ့်ကိုယ်ကိုယ်ရော တပါးသူကိုပါ ခွင့်လွှတ်တတ်ပါစေ။ ကျွန်တော်တို့အားလုံးဟာ Perfect ဖြစ်နေတဲ့ လူ မရှိပါဘူး။ အမှားနဲ့လူတိုင်းကြုံရမှာပါ။ ခွင့်လွှတ်ခိုင်းတယ်ဆိုတာ နောက်ထပ် တူညီစွာ ထပ်အဖြစ်ခံဖို့ တွန်းအားပေးတာမဟုတ်ပါဘူး။ ဒါကြောင့် ဘယ်လို အခြေအနေမျိုးမဆို ခွင့်လွှတ်တတ်ပါစေ။

🔹 လဲကျလည်း အဆင်ပြေတယ်ဆိုသိပါစေ။
စာမေးပွဲ ကျများသွားခဲ့ရင်ဆိုတဲ့ စိတ်နဲ့ ကမ္ဘာကြီးပျက်မလို ဖြစ်ခဲ့ကြတဲ့ ကျွန်တော်တို့ရဲ့ ကျောင်းသားဘဝရဲ့ အတွေးတွေဟာ လက်တွေ့ဘဝမှာ တကယ့်ကိုပမွှားပြဿနာလေး ဖြစ်လို့သွားပါပြီ။ ကျွန်တော်တို့ ရခဲ့တဲ့ အဆင့်တွေ ရမှတ်တွေ ဂုဏ်ထူးတွေ ဘွဲ့တွေဟာ ဘဝအတွက် အတိုင်းအတာတစ်ခုထိ အရေးကြီး သက်ရောက်တယ်ဆိုပေမယ့် ဒါတွေ သင့်မှာ မရှိခဲ့လို့လည်း လက်တွေ့ဘဝမှာ အရှုံးပေး စိတ်ဓာတ်ကျနေစရာ မလိုပါအပ်ပါဘူး။ သင့် လမ်းကြောင်း သင်ဖောက်ပြီး ကြိုးစားခဲ့မှုအတွက် တထောင့်တစ်နေရာမှာ သင့်အတွက် ပန်းတိုင်က ရှိနှင့်နေပြီးသားပါ။ သင့် ပြန် ထနေသရွေ့ တစ်ခေါက် မက လဲကျလည်း အဆင်ပြေပါတယ်။

🔹 အပြည့်အ၀ ရှင်သန်ပါ။
We only live once ဆိုသလိုပေါ့။ ဘာမဆို ကိုယ့်ဘက်က အပြည့်အ၀ ပေးတတ်ပါစေ။ “သူငယ်ချင်း၊ မိဘ သားသမီး၊ ချစ်သူ၊ အလုပ်ရှင်၊ ဝန်ထမ်း” စတဲ့ အမည်နာမတွေရှေ့မှာ အကောင်းဆုံး ဆိုတဲ့ တံဆိပ် ကပ်နိုင်လောက်တဲ့အထိ ကိုယ်တိုင် အပြည့်အ၀ ဖြတ်သန်း ကြိုးစားရင်း ရှင်သန်ပစ်လိုက်ပါ။

🔹 ဆိုတော့ ဘဝဆိုတာ တိုတိုလေးပါ။ ကျွန်တော်တို့ လေ့လာသင်ယူ ခဲ့ရသလောက် အတွေ့အကြုံ သင်ခန်းစာတွေကို မှတ်သားလေ့လာသင်ယူရင်း အကောင်းဆုံးနဲ့ အစစ်မှန်ဆုံး ဖြတ်သန်းလိုက်ရအောင်။ သင်ရော …… ဘဝက ပေးတဲ့ ဘယ်လို သင်ခန်းစာမျိုးတွေ မှတ်သားခဲ့ပြီးပြီလဲ ?